Nunarsuarmi eriagisassaqarfimmi uumasut naasullu

Ilulissani Kangiata kangerlussuani iluliarsuit nunarsuarmi eriagisassaqarfiup imartaa inuussutissartaqartilluarpaat. Tamaani uumasoqarluarpoq aalisakkanik, timmissani miluumasunillu imarmiunik.

Kangerlummi inuussutissartaqarluartumi uumasut  

Ilulissani Kangianut sermip sikutaata erngata aattup inuussutissaqarluartup pilersugaanut planktonerpassuit, peqquppassuit aalisagarpassuillu takkussuupput. Iluliarsuillu kangerluup ernga aalaalutsittuarpaa, itinerusumit inuussutissanik qalloraasumik.

Aalisakkani pingaarneruvoq qaleralik, kangerluulli eqqaani nalinginnaasut allat ilaatigut tassaapput saarullik, ammassak eqalussuarlu. Aalisagarpassuit peqquillu timmiarpassuarnik ornigutsitsipput. Imarmiut miluumasut assigiinngitsorpassuupput, tamaani nalinginnaallutik puisit arferillu. 

Nunami uumasut miluumasut 

Kangerluup eqqaani ikittuinnarnik nunami miluumasunik uumasoqarpoq. Ilaatigut silap pissusaata sakkortoqisup naammaannartumik nunap qaavani naasoqarnissaanut tunngavissaqartitsineranik, kiisalu sermersuup sineriaallu akornanni nunatap amilimasuungaatsiarneranik patsiseqarpoq. Tamaani terianniaq nalinginnaavoq, ukalerli qaqutigoornerulluni. Kangerluup kujataaniipput tuttut umimmaallu, qaqutigorujussuarlu nanoqartarpoq. 

Naasut  

Ilulissat Kangiani Nunarsuarmi eriagisassaqarfimmi naasut issittup akulliarmiuupput. Siammarsimanerpaavoq orpigaasat, avaalaqiatut, paarnaqutitut kigutaarnallu nagguiisut ittunik orpigaasaqarfiusoq. Tamakku saniatigut tamaani ilisimaneqartutut naasut sikkersartut suussutsit 160-it missaanniipput, aammalu orsuaasat suussusaat 200-t tamaaniillutik.

Tamaani naasut meterip affaa sinnerlugu naagajunngillat. Taamaattorli qoorortani naammattumik isugutattuni 1,5 meterit tikillugit angissusilinnik siinik orpikkanik naasoqartarpoq. Sumiiffinni allani issoq ujarattooq naaffigiuminaatsorlu annikitsuaqqamik soqanngitsumillu naaffiusoq annertoorsuakkaartoq nassaassaasarpoq.

Pinngortitaleriffiup nittartagaani uumasut naasullu pillugit annertunermik paasisassarsiorit.