Pisuttuartarfiit aqqutaat nuannarineqarnerit aaqqissuunneqarput

Ilulissat Kangiani nunap eqqissisimatitap kinguaariinnit eriagisassanut ilanngussap ilaani pisuttuartarfiit aqqutaat 10 km. tatikingisut iluarsaanneqarneri maanna Kangiata Allaffiata naammassisimalerpai.
20. september 2013

Pisuttuartarfiit pingasuusut aappaluttup – tungujortup kajortorlu nalunaaqutsersorneri ersarissarneqarput inussuliallu aaqqissuunneqarlutik, piffimmilu ataatsimi inussuliat allanngulaarlugit aaqqinneqarput ujaqqat sisoortoorsinnaaneri pissutigalugit.
Pisuttuartarfiit inunnit takisuumik pisuttuarnermik sungiussisimavallaanngitsunut pisuttuarfigissallugit Ilulissallu Kangiani pinngortitami takusassarsiorluni angalaarnissamut periarfissaalluarput. Kangiani pisuttuartarfiit takinaangaanngillat illoqarfik avasillillugu pisuttuartut namminneq utertarsinnaaniassammata.
Ilulissat Kangiani pisuttuartarfiit iluliarmiunit takornarianillu atorluarneqartarput. Pisuttuartarfinnik ataavartumik nalunaaqutsersuisarneq 2005-imili aallartinneqarpoq, Kangianullu takornariartartunit arlalinnit tamanna assut iluarisimaarnarnerarlugu oqaatigineqartarluni.
”Pisuttuarfissatut piukkunneqartut pingasuusut tamarmik (kajortoq, aappaluttoq tungujortorlu) alianaatsorsuupput assullu isikkivigillutik. Nunataa alianaatsorsuaq iluliarsuillu takorluungasaanngitsumik angissusillit! Ilulissaniinninni takusariaqarpatit! Pisuttuartarfiit nalunaaqutsersorluagaapput, taamaattumik tammartajaarnavianngilatit.”
Taamak allappoq takornariaq schweisiminngaanneersoq, nittartakkamut Tripadvisor.com.

Nunap assiga pisuttuarfissanik pingasuusunik nalunaarsorsimasoq ugguuna aaneqarsinnaavoq: www.kangia.gl