Malittarisassiat

Ataani malittarisassiat immikkoortortap nungusarneranik nassataqartitsinatik atuisut sapinngisamik amerlanerpaat nunarsuarmi eriagisaqarfimmik annertunerpaamik nuannaaruteqarnissaannik isumannaarissapput.

Sermermiut: Aasakkut nunaqarfimmi aqquteeqqap avataaniittoqaqqusaanngilaq. Ilaatigut aqquteeqqap sungaartup tungujortullu akornatigut nunaqarfimmik ikaartoqaqqusaanngilaq.

Iliveqarfiit illukullu: Tamarmik itsarsuarnitsanut inatsimmit illersugaapput, isumaqarluni tamakkuninnga aserorterisoqassanngitsoq. Ukiut tamaasa ilivitoqqat ammarneqartarsimasut takuneqartarput, tamannalu ataqqinninnginneruvoq, imarisaasalu aserorterneri taamaalillutik siuarsarneqartarput. Itsarsuarnitsat suulluunniit tummaatareqquneqanngillat, ammarneqassanatilluunniit assaaffigeqqusaanngillat.

Tupertorneq: Tupertortoqarsinnaavoq tamaanilu ikumatitsisoqarsinnaalluni, taamaallaalli sumiiffimmi ataasiinnarmi ulloq unnuarlu ataaseq. Qulimiguulinnut mittarfitoqqap eqqaani tammaariartarfik tamanut ammasoq atorukku pitsaassaaq. Piffissani panerfiusumi (juuli-aggustimi pigajuttumi) ikuallattoqarsinnaanera pissutigalugu ikumatitsinermut tamakkiisumik iterteqqusiisoqartarsinnaavoq.

Cykelit snescooterillu: Eriagisaqarfimmi arlaannaalluunniit atoqqusaanngillat.
Piniarneq aalisarnerlu Eriagisaqarfimmi akuerisaapput, tamaani nalinginnaasumik inatsisit najoqqutarineqartillugit. Takornariat aalisarsinnaatitaanermut akuersissummik pissapput.

Naasut: Naasunik sikkersunik katersuisoqaqqusaanngilaq, allatulluunniit nunarsuarmi eriagisaqarfimmi naasimasunik aserortereqqusaanngilaq.

Eqqakkat: Tamaani eqqakkanik sunilluunniit qimatsilluniluunniit assaasoqaqqusaanngilaq. Assersuutitsialaagit asimiinnernilu takusaqaruit eqqakkanik katersisarit.

Angalaneq: Kangerluup paavata iluani taamaallaat angallatinik mikinerusunik aalisariutinillu angalaartoqaqqusaavoq. Nunamut ikaartoqaqqusaanngilaq. Takornarianik angallassinermi kalaallini pinngortitamik aamma pinngortitap illersornissaa pillugu inatsisinik ilisimasalimmik guideqartussaavoq.

Aqquteeqqat nalunaarsukkat: Aqquteeqqanik nalunaarsukkanik malitaqartarnissaq tamatigut inassutigaarput. Tamanna tikeraat isumannaallisaaviginissaannut aammalu pinngortitap aserfallatsaaliornissaanut tunngatillugu mianersuussineruvoq.

Eqqissisimatitap killeqarfia: Kangiata eqqaani pisuttuartarfiit nunap assingini tamani, najugarisami pisiniarfinni tuniniarneqartartuni (1:20.000 aamma 1:100.000) nunarsuarmi eriagisaqarfiup killeqarfia takuneqarsinnaavoq. Illoqarfiup eqqaani immikkoortortami killeqarfik atuarlugu qitermikkut qisulersukkat inussussuit inissitsitigaapput.