Ilulissani Kangia pillugu allaffik

Nunarsuarmi eriagisaqarfimmi sulineq Avannaata Kommuniata assorsuaq pingaartippaa. 2008-mi Ilulissani Kangia pillugu allaffik pilersinneqarpoq, aammalu site managersimik ataatsimik nunarsuarmi eriagisaqarfimmut akisussaaffeqartumik atorfinitsitsilluni.
Kangia pillugu allaffimmi Nunarsuarmi eriagisaqarfik Ilulissat Kangiata ulluinnarni, najugarisami aqutsinermik suliaqartoqarpoq, Namminersorlutik Oqartussat tassani suleqatigineqarlutik. Nunarsuarmi eriagisaqarfiup aqunneqarnerani pineqarput Nunarsuarmi eriagisassani Ilulissat Kangiata ilanngunneqarneranut tunngavigisatut naleqassutsit illersorneqarnissaat. Allaffimmi site managerip saniatigut attaveqaqatigiinnermut sulisumik ataatsimik aamma park rangerimik ataatsimik atorfeqartoqarpoq.

Kangia pillugu allaffiup suut suliarai?
Nunarsuarmi eriagisaqarfimmut tunngasunik suliassanik tamanik Ilulissani Kangia pillugu allaffiup suliarai, makku ilanngullugit:

  • Aqutsineq allaffissornerlu (aqutsinissamut pilersaarutip, nakkutilliinissamik pilersaarutip aamma tusarniaasitsinernut akissutit suliarineri)
  • Immikkoortortap pillugu paasisitsiniaanerit (nittartagaq, allagartalersuineq, quppersagaq, paasisitsiniutitut filmi il.il.) 
  • Immikkoortortami atugassaqarfiit (aqquteeraqarfiit, ikaartarfiliat, perusuersartarfiliornerit)
  • Kangiata immikkoortortaanik atuisunut – taakkuninnga oqaloqateqarnikkut – paasisitsiniaanerit, atuisartunut ilaallutik innuttaasut, takornariat, ingerlatsiviit, peqatigiiffiit, ilisimatusartut allallu.
  • Tusagassiortunut saaffiginniffissatut aammalu immikkoortortami qullersanit tikeraartoqarnissaanut piareersimanerit.

Kangia pillugu allaffeqarfiup ulluinnarni ingerlanneqarnera Avannaata Kommunianit aningaasaliiffigineqarpoq. Taamaattorli Kangia pillugu allaffeqarfimmi suliniutit amerlanersaat avataanit aningaasaliisarfinnit aningaasaliissutinit akiligaasarput. Allaffik namminersuutigalugu ingerlatsivinnut aningaasannanniarlunilu soqutigisarisanut attaveqanngilaq.