Kangia silallu pissusaata allanngorneri

FN-ip klimapaneliata (silap pissusaanik paasisimasalittaasa) ukiuni 100-ni kingullerni nunarsuatsinni kiassuseq agguaqatigiissillugu 0,7°C-inik qaffariarsimasoq nalilerpaat. Tamanna nunarsuarmi sumiluunniit paasineqarpoq, ingammilli nunani issittuni.
Avannaani ukiunut tulliuttunut 100-nut agguaqatigiissillugu kiassuseq 6-10°C-inik ukiuunerani qaffariassasoq isumaqartoqarpoq. Saniatigut Avannaani ukiuunerani apisarnera 250 procentit tikillugit annertuseriassasoq naatsorsuutigineqarpoq. 

Sooruna Issittumi kiassuseq qaffannerpaasoq?  

Qalasersuaqarfiit eqqaanni apummik sermimillu kiannerulernerata annikillisarpagit seqerngup qinnguaasa uterteqqinneri annikillissapput. Issittup kiannerulerneranut patsisaasunut tamanna ilaavoq. 

Uumasut amerlanerit immaqalu takusimanngisat  

Assersuutigalugit Issittup kiannerulernerani inuuniarnermi atugassat pitsanngorsineqarpata sullinerni ataasiakkaat amerlanerit aniguisalissapput. Nunarpulli aamma uumasunik naasunillu nunamut takkussuuttunik ajornartorsiuteqalersinnaavoq. 

Sermeq annikinneq, ilulissalli amerlanerit  

Issittumi immap sermia ukiut 30-t kingulliit assut annikillisimavoq. Tamanna kianneruleriartuaarneranik patsiseqarsorineqarpoq.

Sermersuup aannera sukkatsikkiartuinnarpoq, sinaatungertai siammariartupallallutik. Taamaattumik siusinnerusumut naleqqiullugu sermip iigaartartoq sukkanerusumik katataqarnerulerpoq, ilulissallu amerlanerit pinngorput.

Sermersuarmit aattoqarnerata nassatarisaanik nunarsuarmi immat ukiuni 100-ni tulliuttuni meteri ataaseq tikillugu qaffassangatinneqarput. Nunarsuarmik kaajallaasunik sarfanik sunniuteqassasoq aamma tamanna aarleqqutigineqarpoq. 

Ilulissat Kangia – nunarsuup kissakkiartuaarneranut ilisarnaat  

FN-imi paasisimasallit naapertorlugit nunarsuarmi kissakkiartuaarneranut qularutissaanngingajavissumik inuup piliaanik naatitsivittut sunniut patsisaasuni pingaarnerpaavoq.

Ilulissat Kangiata ilorpiaani Sermeq Kujalliup utersaarneranut nunarsuup kissakkiartuaarnerata sunniutaanut ilisarnaatinngorsimavoq. Sermilli utersaarneranut nunarsuarmi kissakkiartuaarneq kisiartaalluni patsisaanera tamanit isumaqatigiissutaanngilaq.

Kangerluup iluanut najukkami immap sarfaata erngup kissarnerusup ilorpartinnerata sermip aakkiartorneranut patsisaasoq 2008-mi ilisimatusartut amerikamiut tikkuarpaat.

GEUS-ip nittartagaani Ilulissat Kangiani silap pissusaa aamma silap pissusaata allanngornera pillugit annertunermik atuarit.