Ilulissat Kangia tikeraaruk

Ilulissat Kangiani eqqissisimatitap takuneqarnissaanut periarfissarpassuaqarpoq, inuk nammineerluni imal. Ilulissani angallassisartutut neqerooruteqartartut ikiortigalugit.

Pisuttuaqatigiinnerit  

Aasakkut inuppassuit kangerluk sinerlugu pisulluni paasisassarsiortarneq qinertarpaat. Pisuttuarfissanik nalunaaqutsersorsimasunik pingasunik peqarpoq, taakku 1 tiimimiit ullormik ilivitsumik sivisussuseqarsinnaapput. Nunap assinga pisuffissanik takutitsisoq qarasaasiamit download-terlugu aaneqarsinnaavoq (uani ataani) Ilulissaniluunniit pisiarineqarsinnaavoq. Pisunnermik misilittagaqarluartut ullut arlerlugit angalaarsinnaapput tupermik nunallu assinganik nassarlutik kangerluullu kujataatungaa avannaatungaaluunniit paasisassarsiorfigalugu.

Angalaarnerni tamani allanut naleqqiullugu angalaarfik ammukajaaqarnerullunilu qummukajaaqarneruvoq masassinnaallunilu, taamaattumik piffissaqarluarnissaq naatsorsuutigineqartariaqarpoq skuullu naleqquttut atoqquneqarput. Angalaarnermi tassani oqarasuaatikkut (mobil-ikkut) attaveqarneq naatsorsuutigisariaqanngilaq imal. inuit allat naapinnissaat. Taamaattumik allat oqarfigijuartassavatit sumunnarnerlutit qaqugulu uternissat naatsorsuutiginerlugu. Nammineerlutit qaqqami angalaarneq sungiusimanngikkukku ilisimannitsilerluni angalaarnernut ilaasarnissat innersuussutigissavarput.

Angalaarnernut takinerumaanut Greenland Tourism-p angalaartarnerni nunap assiutaasa 1:25.000 aamma 1:100.000 nassarnissaat innersuussutigineqassaaq (Ilulissani pisiarineqarsinnaapput).

Nunap assinga pisussffissnik takutitsisoq ammaguk

Nunakkut angalaartunut ilisimassatsialaat

Imaatigut qulimiguulinnillu angallassineq  

Ilulissanik misigisaqarniarluni kangerluup paavani immatigut angalaneq nuannarineqarluarpoq. Iluliaqarpallaarujussuarnera pissutaalluni kangerluttaviani immatigut angasinnaaneq tamatigut ajornartarpoq. Taamaaliortoqassappat inuussutissarsiutigalugu aalisartunut piniartunullu kangerluttaviani angalasinnaaneq taakkunuinnaq pisinnaasoq inatsisitigut periarfissaavoq. Takornariartaassuit umiarsuillu allat 1000 GRT-sinit anginerit eqqissisimatitami angalaqqusaanngillat. Takornarianik immatigut angallassisinnaaneq taamaallaat angallatinut inunnik angallassisinnaanermik akuerineqarsimasuni (P-godkendte) pisinnaavoq.
Sermersuaq iigartartorlu Sermeq Kujalleq misigisaqarfigerusukkukku Ilulissaniit qulimiguulimmi ilaanikkut pisarpoq. Ukioq kaajallallugu timmisoqartarpoq, ukiulli taarnerpaaffiani akuttusuumik taamatut iliortoqartarpoq. Ukiukkut sermersuaq pallinneqarsinnaasarportaaq qimussimik ullut arlerlugit angalanikkut. 

Ukiuunerani pisartut  

Eqqissisimatitami qimussimik angalasinnaaneq periarfissaqarluarpoq – tiimialunnguanik sivisussusulinniit ilisimasassarsiornertut taaneqarsinnaasunut. Qaqqani sikumilu qimussertoqartarpoq. Oktoberimiit apriili ilanngullugu qimussertoqakkajuppoq. Piffissami tassani Sermermiut Qooruata eqqaani sisorarfissaq iluarsaanneqarsimasarpoq qaqugukkulluunniit atorneqarsinnaasoq. Qamuteralaat (snescooterit) eqqissisimatitami atorneqaqqusaanngillat nipituallaanneri silaannarmillu mingutsitsisarneri pissutigalugu kiisalu nunartaanik naasunillu nungullaasinnaaneri pissutigalugu. 

Eqqarsarluaqqaarlutit qinersigit  

Issittuni pinngortitaq avatangiisillu innarlerneqajasuararsuupput. Tamanna eqqarsaatigisassavat eqqissisimatitami angalaassaguit, tassa suut angallatit qinissanerlugit.