Kangia - ulloq misigisaqarfiusoq

Ilulissat Kangerluata allaffeqarfiani sulinermik misiliisutta, Amerikami Washington and Lee University-meersup Jennifer Bulley-p, nunani tamalaani ilisimatuut kalaallillu meeqqat atuarfianni atuartut oqaatsit kulturillu akimorlugit naapinnerat pillugu oqaluttuarpoq.
19. juni 2013

Ilulissat Kangerluata allaffeqarfiani sulinermik misiliisutta, Amerikami Washington and Lee University-meersup Jennifer Bulley-p, nunani tamalaani ilisimatuut kalaallillu meeqqat atuarfianni atuartut oqaatsit kulturillu akimorlugit naapinnerat pillugu oqaluttuarpoq.

New York University Abu Dhabimi ilisimatusartut sisamat taakkulu ilinniartitsisui misissuiffiusartuni ilisimatuut, Denise aamma David Holland, misissuiffiusartuni sulinerminnit ulloq 13. juni 2013 unikkallalaarput. Taamatut unikkallalaarnerminni Ilulissani Atuarfik Mathias Storchimi atuartut pikkorissut tallimat aamma Ilulissat Kangerluanni allaffimmiut naapippaat. Eqimattami ilaasut tamarmiullutik Hotel Arcticimi ullaakkut naapipput; ilisimatuunit, NYU-mi ilinniartunit aamma Ilulissat Kangerluanni allaffeqarfimmi sulisut saqqummiussassat assigiinngitsut tusarnaarniarlugit. Qulequttat siammasissorujussuupput: ilulissat kangerluannit ilisimatusarnermit paasisat, nunani tamalaani ilinniarnertuunngorniartutut inuuneq, matematik toqqaammavigalugu ilisimatusarneq. Saqqummiisoqareermat eqimattami ilaasut anillallutik silami timiminnik aalatitsipput. Timimik aalatitsinermi holdit sorliit sukkanerpaamik tipermik nappaasinnaanersut ilaatigut unammissutigineqarpoq. Nunarsuarmit tamaneersut inuit eqimattami suleqatigalugit akuuffigalugillu assut nuannaraara. Naalagaaffinni assigiinngitsuni inuit kulturiisa paasinnittaasisalu assigiinngissusaat eqimattani takuneqarsinnaavoq: inuit peqataasut ukunannganeersuupput: Mexico, Slovenien, Rumænien, Kina, USA, Canada, Australien, Danmark aamma soorunami Kalaallit Nunaat.

Hotel Arcticip neriniartarfiani nuannivissumik ullup qeqqasioreernerup kingorna eqimattami ilaasut qulimiguulimmut ilaallutik Ilulissat Kangerluannukartussaapput. Ilulissat Kangerluanni allaffeqarfimmi sulisut sinniisaattut tassunga peqataasussatut qaaqquneqarpunga. Inuit 13-iulluta qulimiguulimmut ikivugut, tamatta qangattarnissatsinnut erinisulluta. Pilluta pilluta qangattaratta qaqqat, sermersuaq imerlu qulagiuarlugit timmivugut. Tamatta igalaanut nippusimavugullusooq pinngortitarsuaq takuniarlugu assiliniarlugulu. Sermersuaq, qaqqat sunnguamilluunniit nikkaqanngitsut issittumilu sermersuup aannera imeq atitsinni koorujoortoq takugakkit assut tupigutsappunga. Sermersuup killiganut miitsiaannartugut meeqqat atuarfianni atuartut sukorsit pingasut pinngortitamik misissuiniarlutik arpapput. Sinneruttugut ataqqinnilluta pinngortitarsuarlu takorannersoq isiginnaarparput neriulluta sermersuarmit iluliarujussuaq kaanngartoq qanimut takullugulu tusassallutigu. Ilisimatuup, Denise Hollandip, Ilulissat Kangerluata eqqaanut atortutik nakkutilliissutit paasissutissanillu katersisussat pillugit oqaluttuuppaatigut.

Qulimiguulimmut marloriarluta meqqereerluta; kuussuup takorannersup eqqaani aamma mikkatta, ajoraluartumik Ilulissat mittarfiannut utertussanngorpugut. Nunani tamalaani kulturit peqataaffigisaannik Ilulissallu Kangerluanni nunamik takorannersumik ulloq naallugu misissuereerluta utimut aallaratta illarasaartut qungujulaartullu qulimiguullip iluani tusarsaapput. Iluatitsillunga peqataareerlunga unneqarilluinnarlunga oqassaanga; ilinniarneq, soqutiginninneq nuannisarnerlu misigisaapput nuannersut aamma peqataasut tamatumunnga qularnanngitsumik isumaqataassagunarput.

Jennifer Bulley

Nukaaka, Cuno Jakobilu - Atuarfik Mathias Storch, Ilulissat