Immikkut akuersissummik qinnuteqaat

Nunarsuarmi eriagisaqarfimmi immikkut ittunik suliaqarnissamik kissaateqaraanni immikkut akuersissummik qinnuteqartoqarsinnaavoq.

Immikkut akuersinissamut tunngaviit
Suliniutinut aaqqissuussanulluunniit taamaallaat nalinginnaasumik immikkut akuersissuteqartoqartarpoq qinnuteqaammik siunertamik erseqqissumik uppernarsaasoqarpat, nalilerneqartumik:

1) nunani tamalaani inissisimasutut ilisimatusarnermik siuarsaasutut, imaluunniit
2) nunami namminermit aamma/imaluunniit najugaqarfiup inissisimaffiani kalaallini soqutigisarisanik iluaqusiisutut.

Aammattaaq sulianut immikkut akuersissummik taamaallaat tunisisoqassaaq:

  • mingutsitsinngitsunut, aseruinngitsunut allatulluunniit immikkoortortami pinngortitamik, kulturikkut oqaluttuarisaanermik imaluunniit peqqissarfissaqqissutut naleqassutsinik ajoqusiinngitsunut
  • atuisut sinnerisa immikkoortortamut attaveqarsinnaanerinik ajoqusiinngitsunut 
  • atuuttuartussatut iluseqanngitsunut.

Qinnuteqaatinut immikkut illuinnartunik pisoqaraangat taamaallaat immikkut akuersissuteqartassaaq:

  • immikkoortortami mittarfiit akuerisaasut avataanni nunaannartani qulimiguulimmik mittoqarnissamut pisariaqartitsisunut,
  • nunami angallatinik motoorilinnik angalaartoqarnissamik pisariaqartitsisunut.

Immikkut akuersissummut piumasaqaatit
Suliaq immikkut akuersissummik pisariaqartitsisoq immikkut ittumik nakkutilliinissamik pisariaqartitsinersoq pillugu immikkut akuersissoqassatillugu isummerfigineqassaaq. Immikkut ittumik nakkutilliisoqartariaqassasutut pisariaqartitsisoqarnera nalilerneqarpat immikkut akuerissummik qinnuteqartoq tassunga tunngasunut tamanut aningaasartuutinik akiliisussaavoq. Ilulissani Kangia pillugu allaffeqarfik nakkutilliisussamik toqqaassaaq, tamatumalu annertussusissaanik aalajangiilluni.

Ilisimatusarnermut, filmiliornermut assigisaannullu atatillugu immikkut akuersissutini atortussiap suliarisap assilinera Ilulissani Kangia pillugu allaffeqarfimmut nassiunneqarnissaa piumasaqaatigineqarpoq. Suliniutip imaluunniit aaqqissuussap naammassineranit qaammatit aqqaneq-marluk qaangiutsinnagit nassiussisoqarsimassaaq.

Ilisimatusarnermi atortunik, uppernarsaassutitut atortunik allanilluunniit eriagisaqarfimmi inissiigallarnissamut immikkut ittumik akuersissutissamik qinnuteqaateqartoqarpat immikkoortortamit atortut qanoq qaqugulu piiarneqarumaarnerinik nassuiaammik, kiisalu piiaalluni eqqiluisaarisoqarsimaneranik assilisatigut uppernarsaatinik qinnuteqaatip imaqarnissaa piumasaqaatigineqassaaq.

Qinnuteqaat
Kangiani eqqissisimatitami suliaqarnissaq pillugu qinnuteqarnissamut immersugassaq uani aaneqarsinnaavoq.


Immikkut akuersissuteqarluni suliariniakkap aallartinniarneranut qaammatip ataatsip sioqqullugu kissaatigisaasoq immikkut akuersissummik qinnuteqaammut piffissaliussaavoq kingullerpaaq.


Immikkut akuersissutissat Ilulissani Kangia pillugu allaffeqarfimmut tusarniaanerup kingorna Namminersorlutik Oqartussanit aalajangiiffigineqartarput.