Isumannaallisaaneq 

Eqqissisimatitamut angalanermi silap sakkortoriataartarnerata, nunap isorartunerata nunallu angallaffilunnerata isumannaallisaanerunissaq pisariaqartippaa. 
Ukiut tamaasa inuppassuit Ilulissat Kangerluat ornittarpaat pinngortitarsuaq alutoriartorlugu. Qujanartumillu qaqqani ajoqusertarnerit qaqutigoorput. Kisianni issittumi pinngortitarsuaq allangorarpoq naatsorsoriminaatsoq. Ajutoornerit amerlanerit pinngitsoorneqarsinnaapput asiliartigani qanoq iliornissamut piareersaateqarsimagaanni.

Eqqissisimatitap ilaani illoqarfimmut qaninnermi atorluarsinnaasumik qisummik sanaamik pisuffissiaqarpoq, taanna aqqutigissallugu piuminarlunilu isumannaatsuuvoq. Pisuffissiaq taanna aamma kaamisartakkanut meeraaqqanullu kaamisartakkanut aasaanerani atorluarsinnaasarpoq. Eqqumaffigissavat pisuffissiaq ujaqqallu eqqaaniittut siallertillugu apitillugulu quasarsinnaasarmata. Eqqissisimatitap sinnera soqanngilaq inuilaajulluni, aamma arlaatigut pinartumik pisoqariataassagaluarpat naatsorsuutigisariaqanngilaq inummik ikiusinnaasumik naapitsinissaaq. Oqarasuaatit ingerlattakkat mobilit attaveqanngillat, sumiiffilli Ilulissanut qaninneq kisimi attaveqarpoq. Taamaattumik angalaarnerni sivikikkaluaniluunnit ajutoortoqartillugu pinartunik pisoqariataarsinnaavoq. 

Nuna isorartooq silallu pissusaa sakkortooq 

Issittumi sila eqqoriaruminaatsorijussuuvoq piffissarlu sivikitsoq atorlugu sukkasuumik allanngorsinnaalluni. Seqinnarissorsugaluarluni nuviaqaranilu minutsialunnguit atorlugit anorlilersinnaavoq, siallilersinnaavoq, apilersinnaavoq pujulerluniluunniit. Ujaasinerni annaassiniarnernilu helikopteri ilaatinneqakkajuppoq. Tamanna akisoorujussuuvoq, ujaarineqartorlu nammineq pisuussutiminik ujaarineqarsimappat ujuaarineqarsimasumut ujaasineq/annaassiniarneq akilersinneqarsinnaavoq. Ilutigalugu sila ajorsimappat annaassiniartut inuuneri aamma navianartorsiortinneqarsinnaapput.

2008-mi takornarissat marluk illoqarfimmiit ungasinngitsumiillutik putsumit nalaanneqariataarsimapput, ullullu tallimat (5) qaangiummata aatsaat nassaarineqarlutik. Qujanartumik taamani ajutoortoqarsimanngilaq. 

Ilulissat aseroraangamik inuunermik navianartorsiortitsisarput  

Iluliaq aserortoq tassaavoq navianartoq takujuminaatsoq malerujussuarmik pilersitsisinnaasoq, malerujussuarlu taanna nunap qaanut 15-20 miiterisut qatsitsigisumut anngussinnaavoq aqqusaakkani tamaasa nassatarisinnaallugit. Malerujussuit taamaattut takujuminaallitillu tusaajuminaapput, qaqutigoortumillu inortuitigani iliuuseqartoqartarpoq.

Taamaattumillu Kangerlummi immamut qanittumiinnissaq, pingaartumik Sermermiut sissaani Kangerluullu paavata eqqaani, ulorianarluinnarpoq, soorlu tammaarsimaarluni il.il. 2003-mi takornariat tammaarsimaaqatigiittut taamatut ilulissap aserorneratigut maliliornera ajunaassutigingajassimavaat. Aamma iluliarsuit qanillugit angallatersorneq inuunermik navianartorsiortitsisinnaavoq, pingaartumik sumiiffimmik ilimaarinnilluartumik angallassisoqartigani.